နာဲဟံသာ

ဥက္ကဌ-ဗော်ဍုင်မန်တၟိ(ပစ္စုပ္ပန်)

နာဲဟံသာဝွံ ဒှ်ရဲကွာန်(ဍုၚ်)ဇိုၚ်ကျာ် ပွိုၚ်ဍုၚ်ပံၚ် ခရိုၚ်သဓီု တွဵုရးဍုၚ်မန်ရ၊ မိမတံဂှ် နာဲဗမ်-မိဇဳ မဒှ်တုဲ ကတဵုဒှ်မၞိဟ် ပ္ဍဲသက္ကရာဇ်ဍုၚ် ၁၃၀၉-ဂိတုမာ်၊ သၞာံခရေတ် 1948 ဂိတုဂျာန်နာဝါရဳရ။ ပ္ဍဲကောဒေံနွံမံၚ်(၆) တၠဂှ် ဒှ်ကောန်လၟေၚ်ပန်ရ။ ဂွံအယုက်(၇) သၞာံ စမံၚ်ဘာ တန်မူလတုဲ ဆက်တိုန်ဘာတန်လဒေါဝ် ပ္ဍဲကွာန်ဍုၚ်ကျာ်ဂှ်ရ၊၊ အံၚ်(၇)တန်တုဲဂှ် အာတိုန်ဘာတန်သၠုၚ် ပ္ဍဲဍုၚ်ပံၚ်ရ၊ ဘဝကောန်ၚာ်ဂွံ(၇)ဂှ် အပါပြဟ်လလုဲအာတုဲ ဂွံၜိုတ်(၁၀) သၞာံဂှ် မိပြဟ်လလုဲအာပၠန်ရ၊ ကောဒေံဂမၠိုၚ်ဒးပရး မံၚ်ကၠုၚ်ကရောံ ဣစဳ အမူ၊ မိဇၞော် အပါဇၞော် တအ်ရ။ အခိၚ်ဍောတ်တ်တေံ ဟိုတ်နူညာဏ်သကေက်သကာၜိုတ်ဒးရးတုဲ မသဂမၠိုၚ် မသဂမၠိုၚ်ဘိုၚ်ထံက်ပၚ်ကဵုဟေၚ် ဂွံဆက်တိုန်ဘာ မာန်ကၠုၚ်ရ၊ သၞာံခရေတ် 1966- ဂှ် သှ်လိက်(၁၀) တန် ကျအာတုဲ အတိုန်ဘာပရေၚ်တဵုလွဳ ပ္ဍဲဍုၚ်မုဟ်ဍုၚ်ပွိၚ်(၁၀)ဂိတုရ၊ အခိၚ်တ္ၚဲ တိုန်ဘာတဵုလွဳတုဲ အခဳၚ်ဗ္တံဂှ် တိုန်ဘာ(၁၀)တန် ပ္ဍဲဘာတန်သၠုၚ် ဍုၚ်မုဟ်ဍုၚ်ရ၊ ပ္ဍဲသၞာံ 1967- ဂှ်သှ်လိက် ပရေၚ်တဵုလွဳ ကေုာံ လိက်(၁၀)တန်တအ် အံၚ်အာသီုၜါသာ်ရ။ လုပ်ယိုက်ဂၠေၚ်ကမၠောန်ကေၚ်ကာသၟိၚ် ပ္ဍဲဌာနတဵုလွဳဒေသတ္ကအ်ဒှ်တၟိ ခရိုၚ်ဖျာပုၚ်ပွိုၚ်ဍုၚ်ကျာ်လာ်တေံရ၊ စိုပ်ဒေသတေံဂှ် ညာတ်ဒးဒေတိဍာ်မန်ပိုဲတြေံ ယၟုဍုၚ် ယၟုကွာန်ဗွဲမဂၠိုၚ် ဒှ်မံၚ် ယၟုမန်ကၠာလေဝ် ဂကူမန်ဟွံမွဲ ဒှ်အာဂကူဗၟာအိုတ်တုဲ စိုတ်ဟွံမိပ် ဒှ်ကၠုၚ်ဂဝိၚ်ကုဂကူမန်ပိုဲရ၊ ဂကူမန်ပိုဲဂှ် ကၠာတေံ တန်တဴပိုၚ်ပြဳကၠုၚ် ရးဖာသီ၊ ရဟံသံဝတဳ ကေုာံ ရးမုတ္တမကၠာလေဝ် အခါလၟုဟ်ဂကူမန်ပိုယ်သှ်ေမံၚ်ဆပ္ဍဲရးမုတ္တမ မွဲဟေၚ်တုဲ ပိုယ်ဟွံကၠောန်ပ ရေၚ်ဂကူမ္ဂး ခြာဟွံလအ်ဂကူပိုယ်ကၠေံကၠက်အာမာန်ရောၚ်သာ်ဝွံချပ်စပ်အာရ၊ သွက်ပုၚ်မွဲဗုၚ်  ဒုၚ်သ္ပမံၚ် ဍိက်ပၠက် ညးကလက်ဇကုမ္ဂး  ညးဇၞော်သၠုၚ်တုဲ ဂကူပိုယ်ဒးဒုၚ်ပ္ဍဵုပ္ဍိုက်ဂၠိုၚ်ရောၚ်ညာတ်ကၠုၚ်ရ၊ဟိုတ်ဂှ်တုဲ သွက်ဂွံ ဆဆက်ယိုက်ဂၠေၚ်ကမၠောန်ကေၚ်ကာသၟိၚ်ဂှ် စိုတ်အိုတ်ကၠုၚ်ရ၊ နူတံတေံလေဝ်စိုတ်ဓါတ်ဆာန်ဂကူနွံကၠုၚ်ကီုရတုဲ ပ္ဍဲသၞာံ 1968-ဂိတုမာတ်ချ် (March) သက္ကရာဇ်ဍုၚ် ၁၃၂၉-ဂိတု ဖဝ်ရဂိုန်ဂှ် တိတ်အာကၠောန်ပၠန်ဂတး ပရေၚ်ဂကူ ကရောံဗော်ဍုၚ်မန်တၟိ နနဲဂၠံၚ်တရဴရပ်လွဟ်ရ၊ ဆဵုဂဗပရေၚ်ကြေပ်ဂြတ်ဝါတ်ဂါတ်နာနာသာ်ကီုလေဝ် ဟွံဆုတ်ကလေၚ် ဆက်ကေလာန်ကၠုၚ်မံၚ်ဒဵုကဵုအခိၚ်တ္ၚဲဏံ ဂွံ (၅၀)သၞာံြပၚ်ကၠုၚ်ရ။ 

       စိုပ်ဗော်ဍုၚ်မန်တၟိ အခိၚ်ပြဟ်ဟ်တေံဂှ်မံၚ်ပ္ဍဲဌာန်ဂအုပ်ဗဟဵုတုဲ ဗတောန်ကၠုၚ်ကမၠောန်ရုၚ် ကေုာံကွတ်ဂဥုဲတအ်ရ၊ ပ္ဍဲသၞာံ 1971-ဂှ်ဒှ်ကၠုၚ်ကမ္မတဳဗဟဵုတုဲ ဒးကေတ်ကၠုၚ်တာလျိုၚ်ဗလးရမျှာၚ်နဘာသာမန် ပ္ဍဲဒပ်ပံၚ်ကောံ (တ.ည.လ) ရ၊ 1973 ဂှ်ဒှ် ဥက္ကဌပွိုၚ်ဍုၚ်မုဟ်ဍုၚ်တုဲ ခြာဟွံလအ်ဒှ်ပေါဲဗတိုက်ကုသၞ ပ္ဍဲပွိုၚ်ဍုၚ်လှာဒကှ် အကြာကွာန်ဒဵုထောၚ်ကဵု ကွာန်လိုၚ်ကၞုဲဂှ် ဒးအာဘဲဒဏ်ဂိဂိပ္ဍဲဒဳပ္ဍဲတဲဒးတိုန်ဝဳပ္ဍဲစးပၞာန်တေံရ၊ 1975-ဂှ်ဒှ်ကၠုၚ် ဖက်ဆောညးအုပ်ကာခရိုၚ်တုဲ 1978-ဂှ်ဒှ်ကၠုၚ်ညးအုပ်ကာခရိုၚ်ရ၊ အခိၚ်တေံ ခရိုၚ်မတ်မလီုမွဲဟေၚ် ဗော်ပံက်လဝ်မာန်ရ၊ 1986-ဂှ်ဒှ်ကၠုၚ်ကေၚ်ကာဗဟဵုတုဲ 1989-ဂှ်ဒှ်ကၠုၚ်ဖက်ဆောညးဗဟဵုရ၊ 2003-ဂှ် ညးဂမၠိုၚ်ရုဲစှ် ဒှ်ကၠုၚ်ညးအုပ်ကာနာနာ ဗဟဵုတုဲ 2013-ကြပ်အိုတ်ဂှ်ဒှ်ကၠုၚ် ဒု-ဥက္ကဌဗဟဵုရ။ 

ပ္ဍဲဒပ်ပံၚ်ကောံတအ်ဂှ် စပတံနူသၞာံ 1982- ဒဵုကဵု 1987 ဒးကၠုၚ်တာလျိုၚ် ညးအုပ်ကာနာနာပ္ဍဲဒပ်ပံၚ်ကောံ ဒဳမဝ်ကရေဇြဳဂကူ ကောန်ဍုၚ်အရၚ်ဂမၠိုၚ် (မ.ဒ.တ) (N.D.F) ရ၊ စနူသၞာံ 1988  ကြပ်အိုတ် ဒဵုသၞာံ 1989 အိုတ်ဂှ်

     ဒးကေတ်ကၠုၚ်တာလျိုၚ် ပ္ဍဲပံၚ်ကောံ ဂကူကောန်ဍုၚ်အရၚ်ဂမၠိုၚ် ကေုာံ ဂကောံဒဳမဝ်ကရေဇြဳ တအ်ပံက်လဝ်ဒပ်ပံၚ်ကောံ (မ.ဒ.မ.ခ) (D.A.B) ရ၊ စနူသၞာံ ၁၉၉၃- ဒဵု ၁၉၉၅-ကြပ်အိုတ်ဂှ် ဒှ်ကၠုၚ်ညးအုပ်ကာ နာနာ ပ္ဍဲဒပ်ပံၚ်ကောံ  (မ.ဒ.မ.ခ) (D.A.B) ရ၊ ပ္ဍဲသၞာံ 2011-မံက်အခါဒက်ဒပ်ပံၚ်ကောံ ကံၚ်ဇြဳဖေတ်ဒရာ ဂကူကောန်ဍုၚ်အရၚ်ဂမၠိုၚ် ညဳသာသၟဟ်န် (U.N.F.C)ဂှ် ဒးဒုၚ်ရုဲစှ် နဒဒှ်ညးအုပ်ကာနာနာတုဲ ဒဵု 2014-လဒေါဝ်သၞာံ ကေတ်ကလုၚ်တာလျိုၚ်ရ၊ ပ္ဍဲသဘၚ်သဳကၠဳသၞာံ 2014 ဂှ် ဒှ်ကၠုၚ် ဒု-ဥက္ကဌ တုဲ ပ္ဍဲသဘၚ်သကၠဳသၞာံ 2017 လဒေါဝ်သၞာံဂှ် ဒှ်ကၠုၚ် ဥက္ကဌ ဒပ်ပဍၚ်ကောံ (U.N.F.C) ရ၊ စပ်ကဵုဒက်ပတန်ဓဝ်ၜိုဟ်လလံ ညံၚ်ဂွံသောၚ် ပြဿနာပရေၚ်ဍုၚ်ကွာန်လ္တူခုၚ်မာန် ပံက်ကလုၚ်ဂကောံပ္ညဳပ္ညပ် သွက်ဂွံဒေါံပန်ပှော်အလုံဍုၚ် (N.C.C.T) ဂှ်ဒးကေတ်ကၠုၚ်တာလျိုၚ်ညးက္ဍိုက်ပ်ရ။ ဆဵုဂဗသဳကၠဳဂၠိုၚ်ကဵုဝါကြပ်ပေၚ်ၜါသၞာံကီုလေဝ် ပညဳပညပ်ဟွံပြေပြံၚ်တုဲ  အခါထပက်စၟတ်တဲ ဒေါံပန်ပှော်အလုံဍုၚ်(NCA) အပ္ဍဲသၞာံ 2015-ဂှ် နကဵုဒပ်ပံၚ်ကောံ (?UNFC) ဟဝံစှ်ေစိုတ်တုဲ ဟွံပါလုပ်ကၠုၚ်ရ၊၊

       စပ်ကဵုပရေၚ်သ္ၚိဌာန်မ္ဂး 1973- မံက်ဂှ်စှ်ေဒၞာဲကု မိညိၚ် ရဲကွာန်လှာၜိုပ် ပွိုၚ်ဍုၚ်လှာဒကှ်တုဲ ဂွံကောန်(၆)၊ ကောန်တြုံ (၃) ကောန်ဗြဴ (၃)ရ၊ ကောန်ဗြဴလဒေါဝ်ဂှ် ဂွံအယုက်(၂)သၞာံပြၚ်ဒးထောံအာတုဲသှ်ေမံၚ်ကောန်(၅)ရ၊ ဝါသနာချူလိက်နွံတုဲ နကဵုဘာသာမန် ဘာသာဗၟာတက်ပတိတ်လဝ်လိက်အုပ် ၃/၄ အုပ်ကီုရ။ လပါ်ကွိၚ်ကွိုက်အနုသုခုမလေဝ်ဝါသနာနွံမံၚ်ကီုတုဲ ကေၚ်ချူလဝ်ဒွက် ၜိုတ်(၁၅)ဒွက်ပြၚ်ၚ်နွံရ။ ချူလဝ်ကဗျနကဵုဘာသာမန်ဘာသာဗၟာတအ်ဂှ်ပံၚ်ပကောံ တက်ပတိတ်လဝ်နွံမွဲအုပ်တုဲ အပ္ဍဲကဗျ နွံပ္ဍဲလိက်အုပ် ဘာသာမန်တအ်ဂှ် ညးလ္ၚဵုကၠောန်သ္ပလဝ်ဒွက် နွံၜိုတ်(၅)ဒွက်ရ၊ ဂလာန်ဒုၚ်ကေတ်လဝ်ပ္ဍဲစိုတ်ဝွံ ကမၠောန်စပ်ကဵု ပရေၚ်ဂကူဇကုဂှ် သ္ပလဝ်အဓိကတုဲ ပရေၚ်ထတ်ယုက်ခိုဟ်မံၚ်ဏီမ္ဂး ဆက်ကၠောန်အာဒဵုစိုပ်တိုၚ်ပ္ကဴရောၚ်။

       နာဲဟံသာဝွံ နူကဵုသ္ဘၚ်သဳကၠဳဗော်ဍုၚ်မန်တၟိ အလန်ဒသမ မကၠောန်ဗဒှ် အပ္ဍဲဗဟဵု စနူစၟတ်တ္ၚဲ ဒဳဇြေန်ဗာ ၂၅၊ ၂၀၁၉ စဵုကဵုစိုပ် ဂျာန္နာဝါရဳ ၈၊ ၂၀၂၀ဂှ် ဂွံဒုၚ်ဂိုၚ်ကေတ် နဒဒှ် ဥက္ကဌဇၞော် ဗော်ဍုၚ်မန်တၟိရ၊   ပ္ဍဲ ၀၂၊၂၅၊၂၀၂၄ ဂှ် နူကဵုဂကောံဆက်စၠောံဂကူမန်အလုံဂၠးကဝ် ပအပ်ပြာပ်ကုနာဲဟံသာ တဆိပ်ကြာမွဲမၞုံယၟု->ဝိရဟံသာ<- ရ၊

  တၠဂုဏ်အ္စာအဇ္ဇ ကေတ်လဝ်အဆက်တု

  နာဲဆာန်မန် ကောန်နာဲဟံသာချူလဝ်တုဲ နိဿဲကဵု ပရိုင်ဗၠးၜးမန်တုဲ ထပ်သ္ပလဝ်အာပ်ဒုက်ရ၊၊