ပုင်သင်္ကြာန်

နာဲထဝ်သောန်

ပ္ဍဲကၟိန်ဍုၚ်ပိုဲဝွံ ကၠာတေံပါဲနူဂကူမန်တုဲ ဂကူတၞဟ်ဟ် မပ္တံ ဗၟာ၊ ချေၚ်၊ ကချေၚ်တံ ဂွံကၠောန်တောံတိုပ်ပုၚ်သၚ်္ကြာန်တုဲ ဂွံစသုၚ်၊ ဂွံဖာပ်ဗ္စဂှ် ဟွံမွဲသက်က်ရ၊ ဆဂး အခိၚ်လၟုဟ်မ္ဂး ဟိုတ်နူမန်တံ စသုၚ်ဖာပ်ဗ္စမံၚ်ရိုဟ်ဟ်သၞာံတုဲ ဂကူဗၟာတံလေဝ် စှ်ေအာစိုတ်တုဲ ဗီုမန်တံကၠောန်ဂှ် ညးတံလေဝ်ကၠောန်တောံတိုပ်တုဲ စသုၚ်ကၠုၚ်ဂှ် ဂွံဆဵုကေတ်ရ၊၊ 

အခိၚ်လောန်ကၠုၚ်တေံမ္ဂး ပုၚ်သၚ်္ကြာန်ဂှ် သ္ၚိညးညးကၠောန်စကီု၊ ယဝ်ရဖာပ်ဗ္စကဵုဒါန်မ္ဂး တောံတိုပ်ဂၠိုၚ်ၚ်တုဲ ဖာပ်ဗ္စညးသ္ကအ်အိုတ်ဂှ် ဂွံဆဵုကေတ်ရ၊၊ အခိၚ်လၟုဟ်မ္ဂးပၠန် ပုၚ်သၚ်္ကြာန်ဂှ် ဆၜိုတ်ကၠောန်စပ္ဍဲသ္ၚိ ကၠောန်စပကုသဵုဟွံသေင် စိုပ်အခိၚ်အတးမ္ဂး ပုၚ်သၚ်္ကြာန်ဂှ် သွံစမံၚ်ပ္ဍဲဖျာ ဗီုကဵုသွံစခၞံဍာ်ဂဂေါမ်၊ ကဝေက်၊ ကွာၚ်ၜဲကီုဂှ် ဂွံဆဵုကေတ်မာန်ရ၊၊ 

အခိၚ်အတးဂှ် ဒှ်အခိၚ်ကတဴကတာန်ဂၠိုၚ်တုဲ ယဝ်ရဂွံစပုၚ်သၚ်္ကြာန်မ္ဂး ၜိုဟ်သြိုဟ်တိုန်မြာတိုန်တုဲဂှ်ရ မၞိဟ်ဒးစိုတ်ဂၠိုၚ်တိုန်ရောၚ် ဒးဆိၚ်ဆကေတ်ရ။ 

ညးၚ်ရဴဂွံထိၚ်ဒက် အခိုက်ကၞာယေန်သၞာၚ်မန် ဂကောံလိက်ပတ်ယေန်သၞာၚ်မန်ဍုၚ်လ္ဂုၚ်ကဵု ဍုၚ်မတ်မလီု ရိုဟ်ဟ်သၞာံ စိုပ်အခိၚ်အတးသၚ်္ကြာန်မ္ဂး ကလအ်မၞိဟ်ဇၞော်အိုတ်တုဲ ဖာပ်ဗ္စပုၚ်သၚ်္ကြာန်ဂှ် ဂွံဆဵုမံၚ်ရ၊ မန်ဍုၚ်သေံ ဒျောဒျာတံလေဝ် ဗီုမန်ပိုဲပ္ဍဲကၟိန်ဍုၚ်ဏံကီု ကၠောန်စမံၚ်ပုၚ်သၚ်္ကြာန်ဂှ် ဂွံတီကေတ်ရ။ 

ဝေါဟာသၚ်္ကြာန်ဂှ် စောန်ဆက်စှ်ေကၠုၚ် နူဝေါဟာသံသကြိုတ် “သကြာန္တ” တုဲ အဓိပ္ပါယ်ဝေါဟာဂှ် “ကၠောံအာ” မဒှ်ရ၊ “ကၠောံအာ” ဂှ် ယဝ်ရဒးကဵုအဓိပ္ပါယ်ဗွဲတြးမ္ဂး နူကဵုသၞာံတြေံကၠောံအာသၞာံတၟိမဒှ်ရ။ ဟိုတ်ဂှ်ရ အခိၚ်အခါကၠောံသၞာံဂှ် အခိၚ်အတးသၚ်္ကြာန် ပိုဲကော်ခဴစအိုတ်ရ။ 

အခိၚ်ကၠောံသၞာံစိုပ်မ္ဂး  ပုၚ်ၜိုဟ်လဝ်တုဲ လာၚ်ဍာ် ညံၚ်ဂွးဒှ်ဗီုခၟောံမၠဵုတုဲ စကဵုဍာ်ထီုမြမောဝ်ဂှ်  ပိုဲကော်စပုၚ်သၚ်္ကြာန်ရ၊၊ ဗီုပုၚ်သၚ်္ကြာန်ဂွံမံက်တိုန်၊ ဂွံက္တဵုဒှ်တိုန်ဂှ် တၠပညာမန်ပိုဲတမၠာတံ ချူလဝ်ပ္ဍဲသၠပတ်ဓမ္မပါလဂှ် အတိုၚ်ဗွဲသၟဝ်ဏံရ။

ပ္ဍဲလက်ထက်ဘဒြကဝ်ဝွံ နွံသေဌဳမွဲ မပတၠပိုန်ဟာန် ညံင်တိသုန္ဓရဳ ထစေင်အာကီုရ၊၊ နွံကာလမွဲတ္ၚဲ ထမှောံအရက် (အိက်အရက်) မွဲ ပတၠကောန်တြုဟ်ၜါဂှ် ဍေဟ်တိုန်ပ္တီ နာဲပိုဲ သေဌဳဂှ်

“ပိုန်ဟာန်ယဿပတ် တၠအဲဇၞော်ကွေံရ၊၊ ဆဂး တၠအဲ ဟွံတုပ်အဲဏီ၊၊” သာ်ဝွံ ဍေံဟီုကဵု သေဌဳရ၊၊ သေဌဳမိင် လဟီုထမှောံအရက်ဂှ်တုဲ ကာလသၟာန်တမှောံအရက်

“မုဟိုတ် ဟွံတုပ် ကုတၠအဲရော” ဂှ် သာ်ဝွံ တမှောံအရက် သ္ဂးကဵု သေဌဳဂှ်ရ၊၊

“ပိုန်ဟာန်တၠအဲဂှ် ဂၠိုင်ကွေံ၊ ဆဂး ကောန်တြုံ ကောန်ဗြဴ မွဲလေဝ် ဟွံမွဲ၊ ကာလတၠအဲ စဴအာဘဝပလိုတ်တုဲ ပူဂဵုဂွံပကုသဵု ကဵုဒါန်တုဲ ဂွံဇိုန်ပိုန်ပြင်ဏာ တၠအဲသ္ကောံကလိဂွံသမ္ပတ္တိတသိုက် ဟွံမွဲသက်သက်ရ၊၊ ဟိုတ်ဂှ်ရ ပိုန်ဟာန်တၠအဲဂှ် ဒှ်မံင်အာဲတၟာဲသံသာတုဲ ပိုန်ဟာန်တအ်ဂှ် သွက်တၠအဲ ဒှ်ဒၟံင်သၟးသၟးရ၊၊ အဲဂှ် ပတၠကောန်တြုံၜါတုဲ ဗတ်ရအဲချိုတ်အာကီုလေဝ် ဒဝိင်အစံင်အတူသောသၞာ ဟွံမွဲရ၊၊ အဲချိုတ်အာတုဲ ကောန်အဲ သ္ဂောအ်ပ္တုဲဓဝ်ကုသဵု သ္ဂောအ်ဇိုန်ပိုန် ပြင်ဏာကဵုသမ္ပတ္တိမပြဲပြဲဂှ် အဲကလိဂွံရ၊၊ ဟိုတ်ဒၟာသာ်ဂှ်ရ တၠအဲ ဟွံတုပ်ကဵုအဲ အဲမ္ဒးဂးရောင်၊၊”

သေဌဳမိင် ဂလာန်တမှောံအရက်ဂှ်တုဲ သာ်ဝွံ သေဌဳဂးရ၊၊

“တမှောံအရက်ဝွံ ဍေံဆက်တၞောဝ်ဒတောဝ်အနာဂတ်ရောင် ဟွံသေင်ဟာ ပသာ်အဲ ကလိဂွံ ကောန်တြုံမွဲ မၞုံကဵုရုပ်သာ် မၞုံကဵုပညာသကာ မပ္ကင်ရင်လဝ် ရုပ်သာ်ကျာ်သြဳ မပြဲလောန် မတၟေင်လောန် နူညးသအာင်ဂှ်ရော၊၊”

သေဌဳဂးတုဲ အာတ်ကောန် ကုသၟိင်ဂိတု၊ သၟိင်တ္ၚဲ လုကဴဂြိုပ်ပိသၞာံကီုလေဝ် သၟိင်ဂိတု သၟိင်တ္ၚဲ ကဵုဟွံမာန်၊ လုကဴပိသၞာံလောန်အာတုဲ ပ္ဍဲကာလဇန်တအ် ဝေင်သဘင်ကၠောအ်သၞာံ သေဌဳတွဳပွိုင်ကေတ် ကမၠောန်မံင်မှ မိမိန်ၝဲဂမာ သီုတွဳဝါရဂမၠိုင်၊ သီုက္ဍိုင်ထဝ် ဇၞောဝ်အလာံတုဲ ဇက်တိတ်အာ သင်ဂင်သၟဝ်တၞံဇြဲသုံရ၊၊ စိုပ်ဇြဲသုံတုဲ သေဌဳ ပူဇဴဒေဝတဴဇြဲသုံ ကုပုနပဍုန်တုဲ လာင်ထပှ်ဝါ ညံင်ရဴခမောံမၠဵု သီုဍာ်ထီုမြမောဝ် ကေုာံ အမာဲမဒးရး ပူဇဴတုဲ သေဌဳ အာတ်ကောန်တြုံရ၊၊ ပိဏ္ဍပါတ် ပသၟိဟ်နူဂှ် စဟာပ်ဝေင်ဂြိုင်တုဲ ကဵုဒါန် ကုကမၠောန်မံင်မှ မိမိန်ၝဲဂမာတုဲ သဳကၠဳမံင် ဒေဝတဴ သီုကဵုကွိင်ကွိုက် မဂၠိုင်ကဵုသာ် ဗရုတမ္ညဝ်ဒၟံင်ရ၊၊ တုဲ သေဌဳ ကလေင်ဇက်စဴ ပြာသာဒ်ဇကုရ၊၊

ဒေဝတဴဇြဲသုံဂှ်လေဝ် ဗီုသေဌဳမအာတ်ဂှ် ကဵုဟွံမာန်တုဲ တိုန်အာကဵု သၟိင်အိန် အာတ်အရီုအဗင် သၟိင်အိန်ရ၊၊ သၟိင်အိန်ပၠန်လေဝ် တရးမတ်ဒိပ် အလုံတာဝတိံ ညာတ်ဒးကောန်ဒေဝတဴ ဓမ္မပါလ ကော်ပဆိုက်နင် ဓမ္မပါလတုဲ သၟိင်အိန်ဂးကဵု ကောန်ဒေဝတဴ ညံင်ဂွံအာတန် ပဋိသန္ဓိ ပ္ဍဲဂၠံဂဝ် တၠသ္ၚိသမ္ဘာသေဌဳရ၊၊ ကောန်ဒေဝတဴ ဓမ္မပါလလေဝ် အာတန် ပဋိသန္ဓိ ပ္ဍဲဂၠံဂဝ်တၠသ္ၚိသေဌဳ ပေင်ဒ္စိတ်ဂိတု ဒ္စိတ်တ္ၚဲတုဲ သၠးဂၠံဂဝ် နကဵုကောန်တြုံ မၞုံကဵုရုပ်သာ်ကျာ်သြဳ မတုပ်တဴ ရဴသၟိင်ဂိတုမအာစိုပ်စှ်သုန်မံက်ကီုရ၊၊ သေဌဳမိပ်စိုတ် ဗွဲမလောန် ကဵုယၟုဓမ္မပါလ ခၞံပြသာဒ်မွဲ သၟဝ်တၞံဇြဲသုံဂှ်တုဲ ကောန်ဓမ္မပါလဂှ် တိုန်ထ္ၜုတ်လဝ် ပ္ဍဲကဵုခရေင်ထဝ် ပ္ဍဲပြသာဒ်ဂှ်ရ၊၊ သီုကဵုကမၠောန်မံင်မှတအ် ကဵုပူဇဴဒေဝတဴဂြုဂြုဂြီုဂြီုအိုတ်ရ၊၊

ကောန်သေဌဳဓမ္မပါလဂှ် ဟိုတ်နူပါရမဳအတိက်တေံဂှ်ရ ကာလအာစိုပ် အာယုက်ထပှ်သၞာံဂှ် ပတၠပညာ ဗွဲမလောန်တုဲ ဒယှ်တှ်အာ အလုံဂတဇမ္ဗုဒိတ် သီုကဵု ဒယှ်တိုန်အာ ဒဵုဍုင်ဗြီုရ၊၊ ဗြီုမၞုံယၟု ကပ္ပဳလမှာဗြီု နူဍုင်ဗြီုဂှ် မိင်ပရိုင်ဒယှ် ဓမ္မပါလဂှ်တုဲ စှ်ေကၠုင် ကဵုဓမ္မပါလ သွက်သ္ဂောအ်စမ်ၜတ်ပညာ ဓမ္မပါလရ၊၊ ပ္ဍဲကဵုမစမ်ၜတ်ပညာဂှ် ကပ္ပဳလမှာဗြီု ပတိုန်ထ္ၜးသၟာန်တုဲ ယဝ်ရဓမ္မပါလဂှ် သှ်ဒးမ္ဂး က္ဍိုပ်ညးတေံကုတ်ကၠေံတုဲ ဒးဒုင်ပူဇဴကဵုဓမ္မပါလရ၊၊ ယဝ်ရဓမ္မပါလ သှ်ဟွံဒးမ္ဂး က္ဍိုပ်ဓမ္မပါလဂှ် သ္ကုတ်ကၠေံတုဲ ဒးဒုင်ပူဇဴကဵုညးတေံရောင် ညးတေံဟီုကဵုဓမ္မပါလရ၊၊ သၟာန်ကပ္ပဳလမှာဗြီုဂှ် 

 

“ပ္ဍဲမွဲတ္ၚဲ ပၞောဝ်ကျာ်သြဳပိ ကျာ်သြဳတ္ၚဲယး ကျာ်သြဳတ္ၚဲ ကျာ်သြဳဗတံတအ်ဂှ် မုဒၞာဲမတန်ရော၊၊”

 

ဓမ္မပါလမိင်သၟာန်ကပ္ပဳလမှာဗြီုတုဲ သမ္ၚာတ်ဒမြဴ ကတဵုဒှ် ဗွဲမလောန်တုဲ နူတ္ၚဲဂှ် ထပှ်တ္ၚဲဂတ ညံင်ဂွံသှ်ကဵု သၟာန်အာတ်အခေါင် ကုကပ္ပဳလမှာဗြီုရ၊၊ ကပ္ပဳလမှာဗြီု ကဵုအခေါင်တုဲ စဴတန်တဴမံင် ဌာန်ဇကုရ၊၊ ဓမ္မပါလလေဝ် ဗ္စာရဏာကၠုင် စိုပ်တြဴတ္ၚဲကီုလေဝ် သှ်ဟွံဒးဏီတုဲ သှ်ဟွံဒးမ္ဂး ဒးဒုင်ကုတ်က္ဍိုပ်တုပ်ပ် ဒဴထောံတုဲ ဂစိုတ်ကေတ်ဇကုဇကုဂှ် ပြဲလောန်ရ ဂးတုဲ တိတ်အာ အကြာဂြိုပ် တိက်ဒၟံင် သၟဝ်တၞံဇြဲၜါတၞံရ၊၊ ပ္ဍဲကာလဂှ် လတူတၞံဇြဲ ဟဝ်ကၠိုင်ၝောံကၟက် ဟီုဒၟံင်အရေဝ်ဂှ် -

ၝောံ - ယးဂတ ပိုဲသ္ဂောံစဇွရ၊၊

ကၟက် - မုဟိုတ်တၠအဲ ဟီု သ္ဂောံစဇွဂှ်ရော၊၊

ၝောံ - ကပ္ပဳလမှာဗြီု သၟာန် ဓမ္မပါလဂှ် နူဂယးကျာ်သြဳ မဍုန်ဒၞာဲလဵုရော၊ တ္ၚဲ ကျာ်သြဳ မဍုန်ဒၞာဲလဵုရော၊ သဝ်တ္ၚဲ ကျာ်သြဳ မဍုန်ဒၞာဲလဵုရော၊၊ သၟာန်ကပ္ပဳလမှာဗြီုဂှ် ဓမ္မပါလ သှ်ဟွံဒးတုဲ က္ဍိုပ်ဓမ္မပါလဂှ် ကပ္ပဳလမှာဗြီု ကုတ်ကၠေံကဵုသၞာ်တုဲ ဇွဂှ် ညးတိတ်ထောံ မ္ၚးဍုင်တုဲ ပိုဲသ္ဂောံစရ၊၊

ကၟက် - သွဟ်ကပ္ပဳလမှာဗြီု အဲမိက်ဂွံတီဂှ် ဟီုထ္ၜးကဵုအဲ ဟွံမာန်ဟာ၊၊

ၝောံ - သၟိက်မိက်ဂွံတီမ္ဂး အဲဟီုထ္ၜးကဵုမာန်ရ၊၊ 

 

“သဘဴသတ်တအ်ဂမၠိုင် နူဂယး ၚုဟ်တုဲ စဗက်လာင်မုက္ခဝါတုဲ ဗဗိုဟ်မြမောဝ် ပ္ဍဲမုက္ခဝါဂှ်ရ ကျာ်သြဳဍုန် မုက္ခဝါရ၊၊ တ္ၚဲပၠန်တုန် မပ္တံ မြမောဝ်ဗလိုပ်ဖုံသြိုဟ်ဂှ်ရ ကျာ်သြဳဍုန်သြိုဟ်ရ၊၊ ဒးကာလသဝ်တ္ၚဲပၠန် သတ်တအ် သအးဂတာဇိုင်တုဲ ဖုံဖလိုပ်မြမောဝ်ဂှ်ရ ကျာ်သြဳဍုန်ဇိုင်ရ၊၊”

ဓမ္မပါလဂှ် အရေဝ်ဂစေံကၞေံလေဝ်လေပ်လဝ်ဂှ်ရ၊ မိင်အရေဝ်ဟဝ်ကၠိုင်ၝောံ ကဵု ကၟက်တုဲ မိပ်စိုတ် ဗွဲမလောန် ဒလိုက်ကတဵုစဴကၠုင် ပြာသာဒ်ဇကုတုဲ စၟဳဒၟံင် ကပ္ပဳလမှာဗြီုရ၊၊ ဒးကာလထပှ်တ္ၚဲ ကပ္ပဳလမှာဗြီု စိုပ်ကၠုင်ဂှ် ဓမ္မပါလသှ်ထ္ၜး သၟာန်ဂှ် သှ်ဒးအာတုဲ ကပ္ပဳလမှာဗြီု ဒုင်ပူဇဴ က္ဍိုပ်ညးတေံရ၊၊

က္ဍိုပ်ကပ္ပဳလမှာဗြီုဂှ် ဒကုတ်အာတုဲ ဒၞာဲသ္ဇက်စွံ ဟွံမွဲ၊ ယဝ်ရ ပ္တိုန်စွံ လတူက္ဍိုပ်တၟံ တၟံပြောပ်ဒေါမ်အာ၊ ယဝ်ရဗိုတ်ပ္တိုန် လတူအကာသ ဗြဲဟွံဂူ၊ ဗိုတ်ဏာ ပ္ဍဲဂြိုပ် ဂြိုပ်တူအာ ညံင်ဗတ်သၟ၊ ဗိုတ်ဏာ ပ္ဍဲမှာသၟိတ် မှာသၟိတ်ဒးကှ်အာ ဟိုတ်ဂှ်ရ ညးတေံကော် ကောန်သၟိင်ဗြဴထပှ် မဒှ်ကမၠောန်သၟိင်အိန်တုဲ မွဲသၞာံမွဲဝါ ဒုင်စလောံယဵုကေတ် ညးသ္ကအ်တုဲ အာထ္ၜုတ်လဝ် ပ္ဍဲဂိုဟ်ဂန္ဓလဳဂှ် ညးတေံဟီုထ္ၜးကဵုကောန်ထပှ်ရ၊၊ ဟီုထ္ၜးတုဲ ကုတ်က္ဍိုပ်ကဵု ဓမ္မပါလရ၊၊ ဒုင်ကေတ်တုဲ ဇကုကပ္ပဳလမှာဗြီုဂှ် ဒှ်အာသာ်ထဝ်ရ၊၊

က္ဍိုပ်ကပ္ပဳလမှာဗြီုဂှ် ဗီုမညးတံစၞောန်ထ္ၜးလဝ်ရ ပၞောဝ်ကဵုကောန်ထပှ် ကောန်ဗြဴဇၞော်အိုတ် ဓံင်သဳဒေဝဳဂှ် ဒုင်ကေတ် နကဵုဒလာင်ထဝ် တွဳဗွိုင်ကေတ် ကောန်ဒေဝတဴဂမၠိုင်တုဲ အာအလုံဂၠးကမာင်စက္ကဝါ ဒုင်ပူဇဴကောန်ဒေဝတဴ တြဴနာဍဳတုဲ ဗ္ဒက်သိုန်ကဵု သိန္နရာတ်ထပှ်လတုန်ရ၊၊ ပ္ဍဲကာလဂှ် ကောန်ဒေဝတဴတအ်ဂမၠိုင် ဖေက်အာယုက်ပိုန်ဟာန် ကျာ်သြဳဟုတ်အာဂးတုဲ နူတာဝတိံ တိတ်အာဥဒျာန် ပြာပ်အာ ဇရေင်ဂြိုပ်စိတ္တတာဝိုန် သတ်နူလွာဇုက် မၞုံယၟု အဿဝတဳဂှ် ၜှ်နင်တုဲ လာင်ကၠေံ ပ္ဍဲကြုင်အစဳရဝတဳ ဗၞတ်ထပှ်ဝါ ဖောဝ်အာမောဝ်အာ ရဴကၠေင်သွဟ်ဒိပ်ကီုဂှ် ဂွံတုဲ ပ္ဍဲတၞာအဂ္ဂလဝတဳ နကဵုကွိင်ဒိပ် မသုန်သာ် စသုင်ဝေင်ဂြိုင်အိုတ်ရ၊၊ ဟိုတ်နူဂှ်ရ ဒေဝတဴတအ်ဂှ် ပိုန်ဟာန် ကျာ်သြဳမောဝ်တိုန်အာရ၊၊ ဒုင်ဗဇဴ ကောန်ဒေဝတဴပ္ဍဲတၞာအဂ္ဂလဝတဳတုဲ ပ္ဍဲကာလဂှ် သုဇ္ဇဒိန်လေဝ် ပြုအာမပေင် ၃၆၅ တ္ၚဲရ၊၊ က္ဍိုပ်ကပ္ပဳလမှာဗြီု နူကဵု တဲဓံင်သဳဒေဝဳဂှ် စလောံ တဲမဟောရာဂဒေဝဳရ၊၊ မဟောရာဂဒေဝဳထ္ၜုတ်လဝ် ပ္ဍဲဂိုဟ်ဂန္ဓုလဳဂှ် ဒေဝတဴတအ် နကဵုဇၞောဝ်နာနာသာ် ပၞာင်တိုင် စံင်ဗ္ဂဵုလဝ်တုဲ နကဵုဂအတ်ရမျာင် ပူဇဴ က္ဍိုပ်ကပ္ပဳလမှာဗြီုဂှ် ကောန်ဗြဴကပ္ပဳလမှာဗြီုထပှ် ညာတ်ဗွဲသကာသၟိင်မတုဲ အိုဟ်တၟိုဟ်စိုတ် ဗွဲမလောန်ရ၊၊ ညးကောန်ဗြဴကပ္ပဳလမှာဗြီုထပှ်ဂှ်ရော

(၁) ဓံင်သဳဒေဝဳ

(၂) မဟောရာဂဒေဝဳ

(၃) ဃောရာဂဒေဝဳ

(၄) ကညာဒေဝဳ

(၅) မန္ဒာဒေဝဳ

(၆) မိဿကဒေဝဳ

(၇) ရဿကဒေဝဳ မဒှ်ရ၊၊

က္ဍိုပ်ကပ္ပဳလမှာဗြီု မထ္ၜုတ်လဝ် ပ္ဍဲဂိုဟ်ဂန္ဓုလိဂှ် ပေင် ၃၆၅ တ္ၚဲတုဲ နူကဵုတဲ မဟောရာဒေဝဳ ဗွဲလၟေင် ဒုင်စၠောံတဲ မွဲသၞာံမွဲဝါရ၊၊ အခိင်စၠောံတဲဂှ် အခိင်သင်္ကြာန် ပိုဲကော်ခဴစအိုတ်ရ၊၊ ဗီုမဟီုကၠုင် ဗွဲလတူဂှ်ပၠန် ကၠာဟွံဂွံစၠောံတဲဂှ် ကောန်ဗြဴကပ္ပဳလမှာဗြီုဂှ် စိုပ်အခိင်သင်္ကြာန်မ္ဂး ယဵုကေတ်က္ဍိုပ်သၟိင်မတုဲ တိတ်အာ အလုံဂၠးကမာင်စက္ကဝါ ဒုင်ပူဇဴ ကောန်ဒေဝတဴတအ်ဂမၠိုင် ဗ္ဒက်သိုန်ကဵု သိန္နရာတ် ထပှ်လတုန်တုဲ ဒုင်ပူဇဴ ပ္ဍဲတၞာအဂ္ဂလဝတဳတုဲမ္ဂး စၠောံစိုပ်တဲ ကောန်ဗြဴတၞဟ်မွဲပၠန်ရ၊၊

ဟိုတ်နူသေထဳ အာတ်ကောန် ဇရေင်ဒေဝတဴဇြဲသုံ ပူဇဴပုင်ဍုန်လဝ်တုဲ လာင်ထပှ်ဝါ ညံင်ဂွံဒှ် ရဴခမောံမၠဵု ကေုာံ ဍာ်ထီုမြမောဝ် သီုကဵုအမာဲ ဗွဲမဒးရးတအ်တုဲ ကလိဂွံကောန်တြုံမွဲ မၞုံကဵုပညာကေက်သကာ ပိုန်ဟာန်ဍိုက်ပေင်ဂှ်ကီု၊

ကောန်ဒေဝတဴတအ်ဂမၠိုင် သတ်နူလွာဇုက် အဿဝတဳဂှ် ၜှ်တုဲ လာင်ကၠေံ ပ္ဍဲကြုင်အစဳရဝတဳ ဗၞတ်ထပှ်ဝါဂှ် ဖောဝ်တိုန်မောဝ်တိုန် ညံင်ရဴကၠေင်သွဟ်ဒိပ်တအ်ဂှ် ဂွံပူဇဴ က္ဍိုပ်ကပ္ပဳလမှာဗြီုတုဲ ဂွံစသုင်ဝေင်ဂြိုင်ဂှ် ပိုန် ကျာ်သြဳ မောဝ်တိုန်အာဂှ်ကီုတုဲ၊

 

ပိုဲမန်တအ် စိုပ်အခိင်သင်္ကြာန်မ္ဂး ပိုန်ဟာန် ကျာ်သြဳ ညံင်ဂွံဇၞော်မောဝ်တိုန်အာဂှ် ပုင်သင်္ကြာန် ကေုာံ ကွာင်ၜဲ ယိုဟ်ၜန် အမာဲ ဗွဲမဒးရးတအ်ဂှ် ကၠောန်တုဲ ကဵုဒါန် ဖါပ်ဗစကၠုင်ဂှ် ဟိုတ်နူကဵု စၞောန်ထ္ၜးလဝ် ပ္ဍဲကဵု သၠပတ်ဓမ္မပါလရောင် စှ်ေကေတ်စိုတ်ရ၊

 

ပရူဏံဝွံလ္တူဝဳကဳလေဝ်အာဗှီလ္ၚတ်ကေတ်မာန်ရ။

Thingyan rice (Burmese: သင်္ကြန်ထမင်း, pronounced [ðəd͡ʑàɴ tʰəmɪ́ɴ], Thingyan htamin; Mon: ပုၚ် သၚ်ကြာန်) is a traditional Mondish served during Thingyan, the traditional Burmese New Year. Thingyan rice is infused with water and commonly served with a salad of cured salted fish, which is blanched and fried with onions, along with sour mango or marian plum. The dish is then garnished with roasted chili peppers. Although Thingyan rice originates from the Mon people, it is now commonly prepared throughout Lower Burma.

Posted in: